خليني افاجئك واقلك ان لحد قبل ما اعمل اعداد للفيديو ده انا مكنتش اعرف الازرار الحمراء دي بتعمل ايه او فايدتها ايه وكنت فاكرها مجرد منظر واستايل ل لوحة المفاتيح ومفكرتش حتي اجرب وادوس عليها بالرغم اني طول عمري بستخدم لاب توبات
فلو انت زي حالاتي تعالي اقلك ايه هي وفايدتها ايه وليه الشركات ما زالت بتصنعها ومخلياها موجودة في الاجهزة الجديدة بتاعتها بالرغم اننا في عام 2023
لو فتحت اي جهاز من اجهزة thinkbad الخاصة ب لينوفو اول حاجة هتلفت نظرك هو زرار احمر اصغر من ازرار لوحة المفاتيح.
تحديداً موجود ما بين حرف ال G وال H
ايه هو بقا الزرار ده
بص يا سيدي ده اسمه TrackPoint ده الاسم الرسمي والاسم الغير الرسمي المشهور بيه هو nub او nipple
هانا بلير محكمة لجوائز الواقع الافتراضي لعام 2020 ومطورة الواجهة الامامية لمنصة Hopin
غردت علي تويتر ونزلت صورة ال nub وقالت حد فيكم استخدم الشئ ده قبل كده.
اغلب الاجوبة كانت نعم ، ليه بقا كل الناس فاكراه ؟
القصة بدأت عام 1984 لما Ted Selker وده عالم كمبيوتر شغال في IBM اكتشف ان المستخدمين بيحتاجو اكتر من ثانية عشان يحركوا ايديهم من لوحة المفاتيح لحد الماوس واكتر من ثانية في عالم البيزنس والاعمال تفرق كتير فبدأ يفكر ازاي ممكن نلغي الوقت ده خالص ؟
قعد عمنا Selker وعالم تاني اسمه جو روتليدج سنين كتير عشان يقدروا يحولوا الملاحظة دي الي جهاز قابل للاستخدام وعملوا اكتر من 100 بروتو تايب وبعتوه ل ibm للاختبار
وقد كان واصبح ال trackpoint اختراع متاح ، لما ريتشارد سابر وهو المصمم وراء اول جهاز ThinkPad استخدم ال trackpoint و ريتشارد سابر هو اللي اختار اللون الاحمر المميز لل nub
نجاح وشعبية TrackPoint مكنتش مضمونة خالص
ولاب توب thinkpad الاول اللي صممه ريتشارد سابر مكنش متصمم فيه مدخل للماوس وادمجو فيه ال trackpoint فقط وبالرغم من كده النقاد منتقدوش التصميم عشان مفهوش مدخل ماوس واعجبوا بفكرة ال trackpoint واعتمدوها في عام 1955 وبدأت تنزل مع كل اجهزة ال thinkpad لحد انهاردة
اتكلمنا عن تاريخ صناعة وتصميم ال nub ايه هي بقا اصلا وفايدتها ايه ؟
ببساطة شديدة هي بديلة للماوس وتحديدا كان تصميمها هدفه انهم يقللوا الوقت اللي بياخده المستخدم عشان ينقل ايده من لوحة المفاتيح الي الماوس
لو ضغط عليها ضغطة خفيفة بتحرك مؤشر الماوس ببطء ولو ضغطت عليها بقوة اكتر هتحرك مؤشر الماوس اسرع
وزي ما قلنا انها اتضافت في موديل thinkpad تحديداً لانه لفترة طويلة جدا كان مخصص لاعمال البيزنس وعملوها عشان يوفروا وقت للناس اللي بتكتب كتير علي اللاب توب وكمان لان اللاب توب زمان كان قد الشنطة وكان صعب تنتقل بيه من مكان لمكان فهتيجي حضرتك كمان وتخليني اتحرك بالوزن التقيل ده وكمان تضيفلي معاه وزن الماوس فجت فكرة ال trackpoint
هتقلي طيب لما هو الاسباب كده ليه ما زالوا بيضيفوها لحد دلوقت في بعض الاجهزة زي موديل latitude من ديل او اجهزة thinkbad من لينوفو بالرغم من وجود ال trackpad
هقلك لثلاث اسباب
اولهم وده الاهم ان كتر استخدامك لل trackpad احيانا بيعرق وبيبقا رطب جدا بسبب العرق اللي نازل من ايدك ولما تيجي تستخدمه وهو في الحالة دي بتلاقي مؤشر الماوس حركته صعبه ولازم تنشفه
لكن ال nub مبيحصلش معاها كده
السبب التاني ان ال nub ممكن تستخدمه وانت لابس جوانتي علي عكس ال trackpad مينفعش تستخدمها وانت لابس جوانتي
طيب هل هيتم الاستغناء عن ال nub في المستقبل
الاجابه هي السبب التالت
اذا لاحظت او ملاحظتش لوجو thinkbad هتلاقي حرف ال i عليه نقطة حمراء ودي المقصود منها هو ال nub
ولو دورت وشفت اخر جهاز اتصنع من سلسلة ال thinkbad وهو X1 Carbon الجيل ال 11 هتلاقي ما زال موجود فيه ال nub
ففكرة انهم يستغنوا عنه في المستقبل صعبة وبعيدة شوية وخصوصا انهم لو استغنوا عنه فده معناه انهم هيعملوا rebranding لل لوجو بتاعهم وهيشيلوا النقطة الحمراء من فوق حرف ال i
ومتستغربش لو قلتلك ان عشان يعملوا حركة زي دي هتكلمهم ملايين الدولارت ولو مش عارف ليه ممكن نعملها فيديو لوحدها
بس كده اتمني تكون استفدت من المعلومة.
https://ifttt.com/images/no_image_card.png
https://kharphonk.com/%d9%84%d9%8a%d9%87-%d8%a7%d9%84%d8%a3%d8%b2%d8%b1%d8%a7%d8%b1-%d8%a7%d9%84%d8%ad%d9%85%d8%b1%d8%a7%d8%a1-%d9%81%d9%8a-%d8%a7%d9%84%d9%84%d8%a7%d8%a8-%d8%aa%d9%88%d8%a8/
https://ifttt.com/images/no_image_card.png
https://kharifonk.weebly.com/kharifonk/-99
